தமிழ்நாட்டிலுள்ள அரசு மற்றும் அரசு உதவிபெறும் பள்ளிகளில், பள்ளி மேலாண்மைக் குழு (SMC) மறுகட்டமைப்பு தொடர்பான பெற்றோர் விழிப்புணர்வுக் கூட்டங்களை எவ்வாறு நடத்துவது என்பது குறித்து பள்ளிக் கல்வித்துறை புதிய வழிகாட்டுதல்களை வெளியிட்டுள்ளது.
கூட்டத்தை நடத்துவதற்கான முக்கியப் படிநிலைகள்:
கூட்டத் தொடக்கம்:
பெற்றோர் விழிப்புணர்வுக் கூட்டமானது முறைப்படி தமிழ்த்தாய் வாழ்த்துடன் தொடங்கப்பட வேண்டும்.
நோக்கம் மற்றும் காணொளி காட்சிப்படுத்துதல்:
வருகை தந்துள்ள பெற்றோர்களைத் தலைமையாசிரியர் வரவேற்று, கூட்டத்திற்கான முக்கிய நோக்கத்தைச் சுருக்கமாக எடுத்துரைக்க வேண்டும்.
வழங்கப்பட்டுள்ள QR Code மற்றும் Link வாயிலாக விழிப்புணர்வுக் காணொளிகளைப் பதிவிறக்கம் செய்து பெற்றோருக்குக் காட்சிப்படுத்த வேண்டும்.
குழுவின் பணிகள் குறித்த விளக்கம்:
பள்ளி மேலாண்மைக் குழுவின் முக்கியப் பணிகள் மற்றும் செயல்பாடுகள் குறித்து ஆசிரியர் பிரதிநிதி ஒருவர் பெற்றோருக்குச் சுருக்கமாக எடுத்துரைக்க வேண்டும்.
கடந்த 2 ஆண்டுகளின் செயல்பாட்டு அறிக்கை (2024-26):
கடந்த இரண்டாண்டுகளில் (2024-26) பள்ளி மேலாண்மைக் குழு மேற்கொண்ட பணிகள் குறித்து தற்போதைய SMC தலைவர் விரிவாகப் பகிர்ந்துகொள்ளுமாறு தலைமையாசிரியர் கேட்டுக்கொள்ள வேண்டும்.
இதில் குறிப்பாக:
- எத்தனை கூட்டங்கள் நடைபெற்றன?
- எத்தனை தீர்மானங்கள் நிறைவேற்றப்பட்டன?
- எத்தனை தீர்மானங்களுக்குத் தீர்வு காணப்பட்டன?
- எத்தனை தீர்மானங்கள் நிலுவையில் உள்ளன? போன்ற முக்கியத் தகவல்களைப் பெற்றோர் அறியும் வண்ணம் பகிர்ந்துகொள்ள வேண்டும்.
பாராட்டு விழா மற்றும் அனுபவப் பகிர்வு:
தற்போதைய SMC குழு உறுப்பினர்கள் கடந்த 2 ஆண்டுகளாகச் சிறப்பாகப் பணியாற்றியதற்காக அவர்களுக்கு நன்றி தெரிவிக்கும் பாராட்டு நிகழ்வைத் தலைமையாசிரியர் முன்னின்று நடத்த வேண்டும்.
இந்த நிகழ்வின் போது தலைவர், துணைத் தலைவர், கல்வியாளர் மற்றும் உறுப்பினர்கள் தங்கள் அனுபவங்களைப் பகிர்ந்துகொள்ள அழைப்பு விடுக்க வேண்டும்.
புதிய மறுகட்டமைப்பு குறித்த விளக்கம் (2026-28):
அடுத்து வரும் 2026-28 ஆண்டுகளுக்கான பள்ளி மேலாண்மைக் குழு மறுகட்டமைப்பு மற்றும் புதிய உறுப்பினர்களைத் தெரிவு செய்யும் படிநிலைகள் குறித்துத் தலைமையாசிரியர் அல்லது ஆசிரியர் பிரதிநிதி பெற்றோர்களிடம் தெளிவாகப் புரிய வைக்க வேண்டும்.
சந்தேகங்களைத் தீர்த்தல்:
மறுகட்டமைப்பு குறித்துப் பெற்றோருக்கு எழும் கேள்விகள் மற்றும் சந்தேகங்களுக்கு உரிய விளக்கம் அளித்து, மறுகட்டமைப்பு நிகழ்வில் அனைவரும் தவறாமல் கலந்துகொள்ள அழைப்பு விடுக்க வேண்டும்.
கூட்ட நிறைவு:
கூட்டத்தில் கலந்துகொண்ட பெற்றோர் அனைவருக்கும் தலைமையாசிரியர் நன்றி கூற வேண்டும்.
இறுதியாக, தேசிய கீதத்துடன் கூட்டத்தை முறைப்படி நிறைவு செய்ய வேண்டும்.
No comments:
Post a Comment