தமிழகத்தில் உள்ள பள்ளிகளுக்கு நடப்பு கல்வியாண்டில் பல்வேறு சனிக்கிழமைகளில் வேலை நாள் என்று பள்ளிக் கல்வித்துறை வெளியிட்ட நாட்காட்டியில் குறிப்பிடப்பட்டுள்ளது. இது மாணவர்கள், ஆசிரியர்களுக்கு சுமையாக இருக்கும் எனக் கூறப்பட்ட நிலையில் ஆசிரியர் சங்கங்கள் சில கோரிக்கைகளை முன்வைத்து வருகின்றன.
பள்ளிகளில் வார இறுதி வந்துவிட்டாலே சனி, ஞாயிறு விடுமுறை என்ற கொண்டாட்ட மனநிலை தான் இருக்கிறது. இதை புரட்டி போடும் வகையில் 2024-25ஆம் கல்வியாண்டிற்கான பள்ளிக் கல்வித்துறை நாட்காட்டி வெளியிடப்பட்டிருந்தது. வழக்கமாக ஒரு கல்வியாண்டில் 210 நாட்கள் மட்டுமே வேலை நாட்களாக இருக்கும். ஆனால் இம்முறை 220 நாட்களாக அதிகரிக்கப்பட்டிருந்தது. அதாவது, 10 சனிக்கிழமைகளில் பள்ளிகள் செயல்படும் என்று அறிவிக்கப்பட்டுள்ளது.
இது மாணவ, மாணவிகள் மற்றும் ஆசிரியர்களுக்கு நெருக்கடியாக அமையும். கற்றலிலும், பணியிலும் சுமையை ஏற்படுத்தும் என்று குறிப்பிட்டனர். கடந்த சில வாரங்களில் ஆசிரியர் சங்கங்கள், கல்வியாளர்கள் உள்ளிட்டோரின் கோரிக்கைகளை ஏற்று சனிக்கிழமை அன்று விடுமுறை விடப்பட்டது. வரும் ஆகஸ்ட் 10ஆம் தேதி சனி அன்று வேலை நாளாகும்.
இவ்வாறு ஒவ்வொரு மாதமும் இரண்டாவது மற்றும் நான்காவது சனிக்கிழமைகளில் பள்ளி வேலை நாள் என்று பள்ளிக் கல்வித்துறை அறிவித்துள்ளது. இவற்றை மாற்றி வழக்கம் போல் அனைத்து சனிக்கிழமைகளிலும் விடுமுறை விட வேண்டும் என்று கோரிக்கை முன்வைக்கப்பட்டுள்ளது.
பள்ளிக் கல்வித்துறை இயக்குநருக்கு கடிதம்
சமீபத்தில் கூட பள்ளிக் கல்வித்துறை இயக்குநருக்கு தமிழ்நாடு உயர்நிலை - மேல்நிலை பட்டதாரி ஆசிரியர் கழகம் சார்பில் கடிதம் எழுதப்பட்டது. அதில், நாடு முழுவதும் மத்திய, மாநில அரசு ஊழியர்கள் மற்றும் ஆசிரியர்களுக்கு அனைத்து சனிக்கிழமைகளிலும் விடுமுறை அளிக்கப்படுகிறது. இதே நடைமுறை தமிழகத்தில் பின்பற்றப்படுகிறது.
அரசு ஊழியர்களுக்கு விடுமுறை
வங்கி ஊழியர்களுக்கு கூட அனைத்து 2வது, 4வது சனிக்கிழமை அன்று விடுமுறை அறிவிக்கப்பட்டுள்ளது. ஆனால் உயர்நிலை, மேல்நிலை பள்ளிகளில் 2வது, 4வது சனிக்கிழமை அன்று வேலை நாள் என்பது அநியாயமாக உள்ளது. ஆசிரியர்கள் நலனில் அக்கறை கொண்டு இத்தகைய நடைமுறையை மாற்ற வேண்டும்.
ஆகஸ்ட் மாதத்தில் மட்டும் 2 நாட்கள்
இந்த விஷயத்தில் பள்ளிக் கல்வித்துறை இயக்குநர் தனிக் கவனம் செலுத்தி விடுமுறை அறிவிப்பை உடனடியாக வெளியிட வேண்டும் என்று கோரிக்கை முன்வைத்துள்ளனர். இதுதொடர்பாக பள்ளிக் கல்வித்துறை உடனடியாக அறிவிப்பை வெளியிட்டால், நடப்பு ஆகஸ்ட் மாதமே இரண்டு சனிக்கிழமைகள் விடுமுறை நாளாக மாறிவிடும் என்பது கவனிக்கத்தக்கது.
No comments:
Post a Comment