மாநகராட்சி, நகரப் பள்ளிகளில் காலியாக உள்ள 220 ஆசிரியர் பணியிடங்களை விரைவில் நிரப்பும் என சென்னை மாநகராட்சி ஆணையர் ஜெ.குமரகுருபரன் தெரிவித்துள்ளார்.
பெருநகர சென்னை மாநகராட்சியின் ஆகஸ்ட் மாத மாமன்றக் கூட்டம் மேயர் பிரியா தலைமையில் ரிப்பன் கட்டட மாமன்றக் கூட்டரங்கில் நேற்று (ஆக. 29) நடைபெற்றது. இந்தக் கூட்டத்தில், துணை மேயர் மகேஷ்குமார், சென்னை மாநகராட்சி ஆணையர் ஜெ.குமரகுருபரன் ஐ.ஏ.எஸ், நிலைக்குழுத் தலைவர்கள், மண்டலக் குழுத் தலைவர்கள், மாமன்ற உறுப்பினர்கள், அரசு அலுவலர்கள் உள்ளிட்டப் பலரும் கலந்துகொண்டனர்.
இதில், 15 மண்டலங்களையும் சேர்ந்த பல்வேறு கட்சிகளின் கவுன்சிலர்கள் தங்கள் வார்டுகளிலுள்ள பிரச்னைகள், கோரிக்கைகள் குறித்துப் பேசினர். அப்போது, சென்னை மாநகராட்சி பள்ளிகளில் காலி பணியிடங்கள் அதிகரிப்பு குறித்து அம்பத்தூர் 84வது வார்டு அதிமுக கவுன்சிலர் ஜெ.ஜான் கேள்வி எழுப்பினார்.
இதற்கு பதிலளித்த ஆணையர் ஜெ.குமரகுருபரன், மாநகராட்சிப் பள்ளிகளில் காலியாக உள்ள பணியிடங்களை நிரப்புமாறு ஆசிரியர் தேர்வு வாரியத்திற்கு சென்னை மாநகராட்சி கடிதம் எழுதியுள்ளது. சென்னை மாநகராட்சி 420 பள்ளிகளை நடத்துகிறது. இதில் 1.3 லட்சம் மாணவர்கள் படிக்கின்றனர், என்றார்.
தேர்ச்சி சதவீதம் குறைவதைச் சுட்டிக்காட்டிய ஜான், ஆசிரியர் பணியிடங்கள் காலியாக இருப்பதால், சென்னை மாநகராட்சியால் நடத்தப்படும் பள்ளிகளில் பொதுத் தேர்வு முடிவுகள் இந்த ஆண்டு குறைந்துள்ளன. கொரட்டூர் மேல்நிலைப் பள்ளியில் 27 ஆசிரியர் பணியிடங்களில் 14 காலியாக உள்ளன. கடந்த இரண்டு ஆண்டுகளாக இதுதான் நிலை.
சென்னை மாநகராட்சியின் கூடுதல் பகுதிகளில் உள்ள அரசு பள்ளிகளை பல ஆசிரியர்கள் தேர்வு செய்துள்ளனர்.
குறிப்பிட்ட பாடத்தை கற்பிக்க ஆசிரியர்கள் இல்லாததால், வேறு பாடத்தில் தகுதி பெற்ற மற்றொரு ஆசிரியர் மூலம் மாணவர்களுக்கு கற்பிக்கப்படுகிறது. கொரட்டூரில் உள்ள சென்னை மேல்நிலைப் பள்ளி இந்த ஆண்டு 70 சதவீதம் தேர்ச்சி பெற்றுள்ளது. பள்ளி முந்தைய ஆண்டுகளில் 95% க்கும் அதிகமான தேர்ச்சி சதவீதத்தை பதிவு செய்தது
கூடுதல் பகுதிகளில் உள்ள பெரும்பாலான ஆசிரியர்கள் அரசுப் பள்ளிகளில் சேர விரும்புவதால், சென்னை மாநகராட்சியின் பல பள்ளிகளில் தமிழ் மொழி கற்பிக்க ஆசிரியர் இல்லை.
கொரட்டூர் பள்ளியில் முதல்வர் பணியிடம் காலியாக உள்ளது. தங்களுக்கு உடற்கல்வி ஆசிரியர்கள் இல்லை என்றும் மாணவர்கள் புகார் தெரிவித்துள்ளனர், என்றார் ஜான்.
